Jetzt hab isch mich ma wiedder de Hausarbeit gewidmet, wie jeden Taach un wie jeden Taach immer des Gleische. Mer räumt in de Küsch des ganze Gescherr in die Schpülmaschin, fraacht sisch dadebei wo des alles herkimmt…nachdem mer ja am Aabend zuvor alle Deller, Gläser un Dippe schon beseidischt hat. So wie jeden Aabend, damit mer Moins kaan Schrecke krieht wenn mer sein Kaffee genieße will.
Also sämtlische Tasse, Deller un sonstische Kraam wiedder in die Schpülmaschin. De Schrank nebe draa uffgemacht um des Schpültabdingens rauszuhole. Warum aach immer, guck ich uffaamal uff den Name. Die Dinger heiße tatsächlisch „Saubermax“…ich denk mer noch nix debei und lass die Maschin laafe. Zwaa Schränk weider steht die Waschmaschin, ich mach die uff un pack die 60 Grad Wäsch nei, mach die Lucke discht un schieb die Schublaad fer des Waschmittel uff. Geh wiedder an de Schrank deneber un hol des Waschmittel raus. „Weißer Riese“ nix Neues, kenne mer un nei dademit. Uffs Knöpsche drigge un de Umdrehunge lausche.
E paar Schritt weider nach links gedabbelt fällt mer uff, dass des Cerankochfeld doch noch Flecke vom Abendesse uffzuweise hat. Also wiedder an den Schrank zwische Schpülmaschin un Waschmaschin un hol de Reinischer raus. De guude alde „Meister Propper“ oder alternativ „Ratz Fatz“. Isch schprüh mei Kochfeld ei, wart kurz, wisch des Zeusch wiedder ab un hol aus de Schublad de Cerankochfeldkratzer „Putzboy“…un da fällt de Grosche!!! 
Saubermax, weißer Riese, Meister Propper un Putzboy. Warum heißt des dann net Sauberlisl, weiße Schönheit, Herrin Polaria un Putzdirne? Warum gebbe die Herschteller ihre Produkte männlische Name un sin mir Weibscher aach noch im tiefste Innern so bescheuert geschdeuert das mer des kaafe? Wobei Momendemaa, bei uns kaaft mehr mein Mann ei…käft der des Zeusch weil der der Meinung is, dass dann alles sauberer werd? Wer macht dann den ganze Mißtscheißdreckkram jeden Taach weg? Des sin ja wohl zu 98% die Fraue (ich lass e ma zwaa Prozentscher Schpielraum, fer die emanzipierte Haus- un Singlemänner). Egal wer da eikääft, uns werd doch suggeriert dadefer brauchst de die Kraft des Mannes. Isch seh mein Mann selten am Herd schtehn mit dem Schwamm un nem Putzboy in de Händ un wie sei Hüfte hin un herschwingt, während er de eigebrannte Fettfleck wegrubbelt.
Gucke mer ma weider im Putzschrank. Da hätte mer die Abflussreinischer „Rohr frei“ (aha, woran denke mer dann da???), des Allzweckreinischungsmittel „Der General“ (ei ei Sir), Parkett/Bodenpflege „Denk mit“ (ok net männlich abber männlich gedacht), wie gesacht de annern Fettreinischer „Ratz Fatz“ (aach net männlich abber aach männlich gedacht- mach ma hi)…jetzt wo ich dadehinner gekomme bin, könnt des wohl ewisch so weidä gehn.
Isch lass mich net mehr eilulle von de männlische Versprechunge, wenn ich des net in die Hand nemme würd (oh jaaa, da habbe mers…mer solle des guude Schtück in die Hand nemme!!!) ALSO wenn isch des net in die Hand nemme würd un des jeden verdammde Taach, dann däts de ganz schee bleed aus de Wäsch gucke un dademit mein ich eusch all (außer die zwaa Prozent). Bild eusch bloß nix druff ei das de General de General heißt un (un des is jetzt de werklische Hammer!!!!)
UN DES KLOPAPIER REGINA
copyright bei corinnal 2012
corinnal 